في حوار خاص.. مؤسس HealthKeepers يوضح هدف الجروب وتأثير كورونا

نهى أيمن
يعد جروب HealthKeepers أحد أشهر الجروبات المصرية التي تتحدث عن الأكلات والطرق المختلفة للحصول على أكلات شهية في المنزل.

وأجرى قعدة تريند حوار مع عمرو السيد شلبي مؤسس وصاحب فكرة جروب HealthKeepers الحاصل على ماجستير هندسة ميكانيكا من الأكاديمية البحرية.

نص الحوار مع عمرو السيد أدمن جروب HealthKeepers

• في البداية كيف جاءت لك  فكرة جروب HealthKeepers وما هو هدف هذا الجروب ؟

“فكرة الجروب جاءت لي بعد ما جروب keraٍSh keepers بدأ يكبر وبديهيًا الأكل الغير صحى بيكون مدمر للصحة على المدى البعيد، وكذلك وجود الكرش بيؤدي إلى مشاكل صحية كتيرة جدًا، والهدف إنى كنت حابب أبدأ فكرة تشجع الناس على حياة صحية أكتر ومن هنا جت فكرة HealthKeepers، بالإضافة إلى إن اللي بيميز جروب HealthKeepers عن باقى الجروبات إنه ليس أكل صحي فقط، ولكن شامل كل حاجه ليها علاقة بالحياة الصحية سواء كانت رياضة ودايت و تمارين، بالإضافة إلى الروح والتشجيع الكبير اللي الناس بتلاقيه من بعض على الجروب وده أثر وغير حياة ناس”.

• كيف استقبلت إقبال الأعضاء على الجروب وتزايد اعدادهم يوما بعد يوم ؟

“التفاعل الكبير التعامل معاه وإدارته مشكلة كبيرة كان مطلوب منى مجهود في عمل نظام لإدارة الجروب، ونظام للبوستات التي تقبل عليه، وكمان التعامل مع دكاترة تغذية، وكباتن علشان أقدر أقدم فائدة  للناس في الجروب بجانب مشاركتهم لبوستات أكلهم الصحي وروتينهم في الجيم، فأصبح  كل هذا مرهق جدًا فى الأول، ولكن  الحمد لله الوضع مستقر حاليًا والناس كلها مبسوطة”.

• ماهى المشكلات التى واجهتك فى بداية تأسيس الجروب وكيف تغلبت على هذه المشكلات ؟

“أهم وأبرز المشاكل هي تعدي بعض الأعضاء على حرية الأخرين فكان لابد من وضع قواعد وأعمل تيم علشان يفلتر الأعضاء دايما ويتابع سلوكهم عالجروب، لوجود  بعض الشخصيات عالسوشيال ميديا مؤذية نفسيًا ولسه لحد دلوقتي دايما متابعين التفاعل على الجروب وبنفلتر الأعضاء أول بأول، وأيضًا إني أتمكن من وجود دكاترة وكباتن تنتمي للجروب وتقدم محتوى عليه ده كان صعب في البداية، ولكن أنا بميز أي شخص متخصص على الجروب لحد دلوقتي وبساعده ينزل المحتوي الخاص بيه على الجروب علشان نفضل متميزين دائمًا”.

• من وجهة نظرك هل كان لكورونا الفضل في تزايد أعدد الأعضاء على الجروب والإقبال عليه أكثر من قبل؟

“في الأول فقط، بسبب رعب الناس فكانوا بيتعلقوا بأي محتوى يطمنهم، ولكن حاليًا بعد الحجر الصحى الطويل الناس كرهت كلمة كورونا ومنعنا أي محتوى عن الفيرس ينزل عالجروب نهائيًا، لأننا وعينا الأعضاء بيه في الأول وانتهى، وبدأنا نشجعهم على التمرين في البيت من خلال هاشتاج نزل على الجروب، واهتمينا بالمواضيع الخاصة بالتغذية والتمارين زي الأول”.

• ما هي نوعية المنشورات التي يتم رفضها وكيف يتم التعامل معها ؟

“بنرفض كل بوستات الأكل الغير صحي، بنرفض بوستات الهزار لو محبطة وده علشان نحافظ على الجو العام فى الجروب، وطبعًا بيتم تنبيه أصحاب البوستات المختلفة وتوضيح rules الجروب من خلال أدوات الفيس بوك المتاحة للأدمن”.

• فى النهاية الانسان لا يشعر بقيمة تعبه إلاعندما يرى ردود أفعال الآخرين على الشىء الذي قدمه.. فهل أنت راضى على ردود أفعال الأعضاء في الجروب؟

“بالتأكيد نعم، وبجانب ده في ناس كتير بتكلمني إنها خست وبدأت رياضة بسبب الجروب، وده شىء خلاني أنا والتيم فخورين باللي عملنا ونتمنى نطور منه الفترة الجاية إن شاء الله”.